ГӀалгӀайчен депутаташ баха хилар бӀухой дезал болча
30.09.2023 20:34
Паччахьалкхен Дума депутат, ГӀалгӀайчен Халкъа Гуллама депутат БӀарахой Бек-хан, «ЦаI йола Росси» яхача парте нах тIаийбеча моттига кулгалхо Дарсиганаькъан Мухьмад баха хилар Россе Донбасс лораеш дӀахьоча лаьрххӀача операце дакъа лоацаш болча бӀухой дезалашка фу хьал да хьажа. Уж хилар ГӀалгӀайчен МагӀалбика кхален Юкъерча-Ачалкхе, Дабе-Юрта, иштта Наьсарен кхален Пхьилекъонгий-Юрта. «Тахан вайх хӀаране хьаллоац, вай мохк лорабеш, шоай декхар Даьхенна дӀалуш бола бӀухой. Вайна дика ховш да, шоай са ца кходеш, уж моастагӀчоа духьалъотташ хилар, вай царна еш йола терко чӀоагӀа эшаш а я. Барт цаӀ хиларца вай низ ба. ЦхьоагӀо йолаш вай хуле, вайна дукхагӀа могаргда», - аьлар депутаташа ЦӀечой, Тоачанаькъан, Шоанахой дезалашка шоаш болаш.
ГӀалгӀайчен кулгалхочо Келаматанаькъан Махьмуд-Ӏаьлас 2022 шера лайчилла бетта цхьоалагӀча дийнахьа амара кулг яздир «РФ Герзашцарча низий мугӀарашка шоай тӀема декхар кхоачашдеш барий дезал социальни новкъосталца хьаллацара». Моттигерча Ӏаьдало керттерча декхарех лоархӀар да, тӀема мугӀарашка латтача бӀухой дезал а уж шоаш а хьаллацар.
ГӀалгӀайчено, из доацаш а, тӀом латтача даькъ тӀа гуманитарни новкъостал лоаттаду, тайп-тайпара тӀабувха бӀайха гӀирс, хьалхарча аргӀагIа эша хӀамаш бӀухошта лаьрхӀа дIайохьийташ.
Иштта вай мехко новкъостал лоаттаду Запорожски областа Токмакски кхален бахархошта.
