«Герга истол» дӀахьош, хьалхадаьккхар уж хаттараш кхоачашдарах дола дош. «Даьхен лорбой» яхача ганза  филиала кулгалхочун гӀончас Чаненаькъан Ӏалихана белгалдир, ганзо тайп-тайпара новкъостал лоаттадеш хилар, цу юкъе лорий гӀо дар а, вахара оагӀув хьаллацар а, молхашца Ӏалашо яр а, кхы дуккхадар а да.

Къахьегама, хьадеча хӀаман, вахар дегӀаахара  министра гӀончас Оздой Беслана ший аргӀагӀа белгалдир, новкъостал дара  долча гӀулакхашта чубоагӀаш 750 дезал хилар. Из хоам даим кердабувлаш ба.

Дика къахьег лаьтта декъача даькъ тӀа а. Таханарча дийнахьа, лаьрххӀача операце доакъашхошта  400 лаьтта дӀаденнад.

Моттигерча Парламенте новкъостал дехаш  дехараш ух, яхаш, дийцар унахцӀенон, вахара политикан комитета кулгалхочун гӀончас Олиганаькъан Бадрудина.

Кхетаче дакъа лоацаш хиннача тӀема гӀулакх леладераша шоашта бакъахьа хетар хьалхадаьккхар, цар новкъостал дергда дӀахойодача хана  из хьал хьаллацара.

«СВО доакъашхошта, цар дезалашта  тха оагӀорахьара даим йоккха терко ю, царна лоаттаду лаьрххӀа дола вахара хьалаш.

СВО доакъашхой, цар дезалий бокъонаш лораяр законах хила дезаш да. Из кхоачашдар вай декхар да», - аьлар цига дакъа лоацаш хиннача Халкъа Гуллама кулгалхочо ТӀумхой Мухьмада.