Вай лоамашкара берий салаӀара лагерь Россе лоархӀам болаш хургья
ГӀалгӀайчен ЖӀайрахьа кхале болх дӀахьош ба, «Аьрзи» яха берий лагерь тоаеш. «САФМАР» яхача, дика гӀулакхаш леладеча Гуцаранаькъан Микаила ганзо доккха новкъостал лоаттаду цига, кхувш йоагӀача тӀехьенна салаӀара йола таронаш хьакхоллаш. Таханарча денга кхоачаш, из корпус 90% йистеяьннай тоаяь, уж хувцамаш гаьннара хьежача гуш да.
«Аьрзи» яха лагерь цӀенхаштта тоаяь а Ӏийнаяц, цига тоаеш я къаьнарча гӀишлон чура ченаш, иштта хьалъеш я керда гӀишлош, берашта кхерамзле а йолаш, дика салаӀа хьаеш йола таронаш я уж. «Аьрзи» лагерь тоаярах берий аьттув ба лерттӀа салаӀа, цул совгӀа, вай республикан туристически оагӀув а дегӀайоагӀаргья.
Лагерь цигарча заповедника эггара хозагӀча даькъ тӀа а, ГӀалгӀайчен эггара хозагӀча моттиге а я, гобаьккха ягӀаш архитектуран объекташ а йолаш, Ӏалама хозленна юккъе. Лагерь ерригача Россе лоархӀам болаш хургья, бӀарччача шера болх беш а хургья. Цига ГӀалгӀайчен бераш санна вай мехка кхыча моттигашкара бераш а салаӀа йиш йолаш хургда. Цудухьа оаха лаьрхӀад Россе доазон тӀа дезала салоӀам дегӀабоалабе: шоай бераша салоӀача юкъа, цар даьй, ноаной таро хургья лоаман хозленашка кхача, дика салаӀа.
Къаьстта из бахьан долаш, ахкан зама хьаоттале, болх йистебаккха безаш да тхо, аьтинга бетта бераш хьалхарча сменах салаӀа йиш йолаш хилийтара», - аьлар ГӀалгӀайчен кулгалхочо Келаматанаькъан М-А. «Аьрзи» яха берий унахцӀенон лагерь форда тӀара 1370 метр лакхагӀа я. Лоаман хозалга, дарбан фега, экологега, Ӏалама таронга диллача, из берий дарбанче ше морг кхы йоацаш я.
