Къаман библиотекан кулгалхочо дакъа лаьцар, Кавказа йоазанхой вӀашагӀтехача проекте
Краснодарски края культуран министра Ляпина Викторе, баркал оалаш, каьхат дайтар ГӀалгӀайчен Янданаькъан Джамалда цӀерагӀча Къаман библиотекан кулгалхочун ГӀазданаькъан Радимай цӀерагӀа, «Литературан Кавказ: хьаькъал дарий дӀайха дош хазара» яха халкъашта юкъера онлайн-къамаьл деча цо дика дакъа лацарах. Цу проекто Кавказа йоазанхой, дешархой вӀашагӀтехар, шоайла говзал дӀа-юха екъа таро хилийтар, иштта Кавказа литература, культура езаялийтар.
«Мехкашта юкъерча хоамий-литературни библиотекан проект юкъеяьлар 2022-2023 шерашка, Къилбаседа Кавказа литература доаржадара даькъ тӀа. Цун керттера маӀан дар, Россе гӀибухен кагирхой безам къаман литературанна тӀаозар», - аьлар «Сердало» газетага ГӀалгӀай Республикан къаман библиотекан зарбан болх лелабеча Коазой Ӏашата.
Къилбаседа Кавказа литература дезарашта, бокъонца дола совгӀат хилар цох. Доакъашхой таро хилар цӀихезача авторий кхолламаш довза, уж бар Кавказа тайп-тайпарча халкъий викалаш.
Проекто хьагойтар, хӀара къаман ший литература долга, цо ший къаман культура, истори, Ӏадаташ довзийташ хилар.
