Вай мехкарча ишколай кулгалхой, Москверча Ерригача Россе кхетаче вай республика дӏайовзйташ хургба
Ишколай кулгалхой йоккхача кхетаче дакъа лаца хержаб вай мехкарча цу оагӏонцарча моттигашта хьалхалаттараша. Тов бетта 30-ча денгара ардара бетта 2-ча денга кхаччалца, Москверча «Росси» яхача Къаман керттерча моттига майдан тӏа дӏахьоргба из лоархӏаме болх.
«Хоржама болх, йоккха терко еш, дӏабихьаб. Россе тайп-тайпарча моттигашкара кхаьчача 5 000 совгӏа дехарах хьахержараш 300 толашагӏа бола ишколай кулгалхой ба. Вай мехкара ши кулгалхо я цу юкъе – Магасерча лицей-берий беша кулгал ду Гӏазданаькъан Асланбека Ада, Магӏалбикерча № 5 йолча ишкола кулгалхо йолаш къахьега Дидиганаькъан Ахьмада Зара», - йоах «Сердалога» дешареи ӏилмани гӏулакхех йолча министерствера бенача хоамо.
Россе Президента тӏадилла дӏахьош йолча кхетаче, вӏаший пайда эцаш, кердадараш доаржадеш, хӏаравар шийна нийсагӏа, диканна хургда аьнна хетараш довзийташ, хургва цига. Из кхетаче хьаллоацаш ба АНО « шинне къамаьл. Моттигаш» яха оагӏув. Таьрахьашца дувзаденнараш юкъелоацаш, болх тоабарах дувцаргда йоккхача кхетаче. Вай мехкарча ишколай кулгалхой цига дакъа лоацаш хилар, дега боккха тоам беш да; цул совгӏа, республике цу оагӏонцара болх дикагӏа тоабара тӏехьа а лоархӏаме да из.
