«Ӏарамхи» курорта хӏама тоаде къаьстта кулгалхо оттавергва

«Федеральни оагӏон, Кавказ.РФ моттига лоархӏаме йола из проект йоаржае гӏо дарах баркал оал аз. Таханара тха декхар - хӏама тоадара наькъаш лахар, беррига болх ханнахьа чакхбаккхар. Кавказ.РФ наькъий картаца да ворхӏ моттиге болх дӏабахьар: машиний наькъаш, инженерни оагӏонцара хувцамаш, лоамашкара лыжашца лела никъ, цига лоа тувсаш дола гӏирсаш, массехк оагӏон гӏулакхех йола моттиг, муша никъ. Проектацара болх укх шера тоабаь, гӏулакхаш дӏадоладе деза. Къаьстта терко еш дийцар токаца, газаца, хица дувзаденнарех. Цу оагӏонцара кхоачамбоацараш меттадоаладар лоархӏаме да курорта хӏама тоадара оагӏонца. Хин оагӏонца белгалдаьраш: Кавказ.РФ дехар чулургда, мехкарча цу оагӏонцарча цаӏ волча оператора технически оагӏонца дувзаденнарашка хьожаш болх дӏахьоргба, цул тӏехьагӏа ховргда малагӏча тайпара хувцамаш хила деза, иштта цар мах а. Кхыдола балхаш дӏадахьа рузкъа лоаттадергдола моттигаш а я къоастае езаш», - яздир ший телеграм-оагӏон тӏа вай мехкадас Келаматанаькъан Махьмуд-Ӏаьлас.

Республикан кулгалхочо тӏадиллар; хӏара моттигерча балха лакха терко, тӏахьожам беш; деррига боаггӏача боараме дӏахьош дий хьожаш; нах хилийта, аьнна. Цу берригача балхага хьажа бехктокхаме ваь, мехка цаӏ вола оператор хургва. Моттигерча экономиканна чӏоагӏа лоархӏаме моттиг я туристически курорт «Ӏарамхи».

Цу моттигера гӏулакхаш дикка тоадаро дукхагӏа туристаш тӏаозаргба, кердача бизнеса никъ белларгба, иштта бахархошта болх бе моттигаш хургья. Цудухьа, вай Мехкадас белгалдечох, цу оагӏонцарча министерствошка къоастабе беза цигара болх боаггӏача боараме дӏахьоргбола нах, бехктокхамечар цӏераш йовзаш хила еза тахан.

Республикан Кулгалхочо, оагӏув хьаллацарах, баркал аьлар Россе экономически хьал тоадарах йолча Министерствон кулгалхочун гӏонча волча Назаров Сергейна, АО «Кавказ.РФ» кулгалхочунна Юмшанов Андрейна. Келаматанаькъан Махьмуд-Ӏаьлас белгалдечох, боаггӏача боараме кийчо яь, йоккха юкъ ялале, болх дӏаболабе хьожаргба мехка.