Ер шу чакхдалале, Наьсаре кхо доазув тоадергда
Наьсаре дӀахьош да «Шахьара дика хьалаш хьакхоллар» яха паччахьалкхен программа, «Вахар, шахьара хьалаш» яха къаман проект кхоачашъеш дола балхаш. Карарча шера лаьрхӀад цу программанна чудоагӀаш кхо доазув тоаде, цул совгӀа царех цхьан ЦӀечой урам тӀара балхаш йистедаьхад, яхаш, дийцар «Сердало» газетага шахьара администраце.
Юхейиса ши моттиг - уж я Базорканаькъан проспекта тӀара (дукхаза вӀаштӀара даьча №8 йолча цӀен юхера), Наьсар-Кертерча Дидиганаькъан урам тӀара (библиотекан юхера) сквераш. Цига хӀанз болх дӀахьош ба.
«Царех хӀара доазув лоархӀаме да наха. Карарча шера тоаде ахча хьахийца даьнна кхо доазув тоадергда, хьатӀадоагӀача шера кхы а диъ тоадергда. Массахана наха фу хет хьож, нагахьа санна уж мо дола балхаш дӀадахьа дагахьа шоаш хержа моттигаш яле, со кийча ва царга хьажа», - аьлар Наьсарен кулгалхочо Йовлой Урусхана.
