«Вай мехкара дешара оагӀон хьал тоадеш латт цу беркатеча гӀулакхо», - йоах тхогарча хоамо. Массане дегашта тоам хулаш, хоза дӀадахар из гӀулакх. Вай Мехкадас къамаьл дир цига: «Укх тайпара моттигаш хьаеллача дакъа лоацаш хоза хет, гӀаддаха, делаш латтача вай берий бӀаргаш зийча, дийца ца валлал тоам хул дега. РФ президента Дезала шу да аьнна кхайкадаьча укх шера, Яндаре хьаеллар-йиълагӀа берий беш я»,- белгалдир вай Мехкадас.

Республикан кулгалхочо иштта хьоахадир, укх шера кхы а массехк кердача берий бешо ший наӀараш хьаелларгья, аьнна. Бераш деша, язде, барт лорабе, къахьега Ӏомалуш йола моттигаш вайна массанена чӀоагӀа лоархӀаме я, цу оагӀон моттиг лакхача боараме хилийта гӀерташ, тӀатеӀӀа къахьег вай республикан кулгалхоша, хьакимаша, аьлар Келаматанаькъан Махьмуд-Ӏаьлас.

Яндарерча кердача берий беша, зӀамигача хьаьшашта паргӀатта салаӀа, ловза, яхьаш дӀакхахьа, иштта чаме бола кхача баа моттиг я. Уж безаш, шоай болх дика бовзаш бола хьехархой ба царга цига хьежараш.