«Россе Хий» яхача акцена чубоагIа берригача мехкара волонтераш - «Экология», «Хозача хина моттигаш лораяр», — яхача федеральни проекта ларда тIа, аьлар «Сердало» газетага ГIалгIайчен Iалама министерства.

Карарча шера, Калининградера хьаболабенна Владивостоке кхаччалца, 11 эзар мероприятий дIайихьай цу тайпара балхаш деш волонтераш.

Ше хьакхеллача, укх ворхI шера, 6 млн. саг юкъевоалаваьв шийна цу акце, уж ба 85 регионашкара нах, цар цIенъяьй 10 300 хина йистош, иштта гулъяьй 457 800 маш. совгIа нувхаш.

Доакъашхоша хина бердашка, Россе хина йистошка лостам баьб, моттигаш нувхех IоцIенъяьй. Масала: Байкала, Телецкое, Ладожское, Онежское; иштта Волга, Дон, Обь, Енисейя, Амура, Урала, Печора хина йистошкара нувхаш гулъеш, берда йистош цIенъеш болх баьб.

ДIадахача шера баьча балхага хьежача, эггара дикагIа болх баьча регионашта юкъе я: ГIалгIайчен республика, Къилбаседа-ХIирий мохк, Татарстан.