Керда 12 ишкол хьалъеш латт вай республике
«Дешар» яхача къаман проектага гӀолла, кхы а керда 12 ишкол хьалъеш латт вай мехка. Берашта 6778 моттиг луш хургья ишколаш, хьалъяь яьлча. Ишколай хьал аттачахьа даларал совгӀа, бахархошта 900 балха моттиг лургья цу беркатеча гӀулакхо.
Керда ишколаш хиларга хьежжа, дешара хьал а тоалуш доагӀа.
«Цхьан сменах деша йиш йолаш хургда вай бераш, хӀаьта из боккха толам ба вай мехка. Укх шерара дешара шу долалуча хана, оаха хьайийллар 16 ишкол. Вай йоккха йоацача республиканна доккха совгӀат да из. ГӀадвугаш да, «Дешар» яхача къаман проектага гӀолла керда ишколаш хьалъярал совгӀа, тишъеннача ишколай куц тоаде аьттув хилар», - дийцар тха «Сердало» газетага министра Боканаькъан Аьсета.
Керда ишколаш хьалъеш латт Сурхо тӀа, Пхьиле-къонгий-Юрта, Инаркъе, Йоккхача Ачалкхе, Южне, Берда-Юрта, Эбарга-Юрта, ГӀажарий-Юрта, Наьсаре, Шолжа-Шахьаре.
