Россе ФАДН вай мехка дешара семинар дӀахьош я
Вай мехка нах Ӏомабеш йола семинар дӀахьош ба Россе къамий гӀулакхех йолча федеральни моттига доакъашхой. Къаман паччахьалкхен политиках дараш доаржадарах йолча СКФО моттигашка къахьегаш болча кулгалхой говзал лакхъяра тӀехьа болх дӀахьош я из кхетаче. Къамашта юкъерча бувзамашца дувзаденнача керттердарашта хетаяь я цун дешара программа. Мехкарча боккхача Ӏилманхоша, говзанчаша дӀахьоча лекцешка ладувгӀа, цхьацца балхашка дакъа лаца аьттув хургба цига.
«Дукха оагӀонаш чулоацаш я дешара программа. Паччахьалкхен къаман политикаца, къамашта юкъерча моттигаца, этноконфессиональни, интеграционни политикаца, экстремизм, терроризм яхача зуламашта духьаларча къовсамца, иштта кхыдарашца ювзаенна йоккха программа я йоаржаер», - дийцар «Сердалога» мехкарча Миннаца болхлоша.
Семинар хьаеллача къамаьл деш хилар Миннаца кулгалхочун гӀонча вола Пхьаранаькъан Асхьаб. Цо белгалдир; къаман политикан оагӀонца къахьегарий говзал лакхъяр чӀоагӀа лоархӀаме да, аьнна.
Россе къамашта юкъе цхьоагӀо, барт хургболаш эшаш да из.
