«Даьхен лорбой» яхача ганзо къахьег, вай турпалхой цIераш дагалоаттае гIерташ
Вай къаман турпалхой цIераш дагалоаттаяра тIехьа йола проекташ йоаржаеш, болх дIахьош ба «Даьхен лорбой» яхача ганза моттигерча филиала болхлой. Илдарха-ГIалий тIа ваьхача Россе турпала цIен тIа мемориальни улг хьалтехар цар. Из хоам «Сердало» газетага бир ганза зарбан болх лелабераша.
«Десантно-тIалатача рота кулгал деш хиннача вай къаман деналах визза хиннача бIухочун цIи массахана дагалоаттаяра тIехьа къахьега, арабаьлар Темирханаькъан Iийса, Оздой Тимур. Шахьара мэре гIо деш дIабихьар цар шоай болх», - йоах тхогарча хоамо.
ДIадахача шера бIаьстан тIехьарча бетта, лозаваь, вахар хаьдар Хамхой Адама. Лозаваьчул тIехьагIа а ший моттигера дIаваха ца тугаш, ший тIема декхар кхоачашдеш, лаьттав из. Лозаваь массехк ди даьнначул тIехьагIа, сецар цу майралах, деналах, яхьах визза хиннача, къаман сийдолча виIий дог.
