«Ноахал 18-35» яхача кхетаче гуллургба СВО ветеранаш, гӏо деш лелараш
Укх бетта 29-ча денгара ардара бетта 2-ча денга кхаччалца, «Ноахал 18-35» яха Ерригача Россе кхетаче дӏахьоргья вай мехка. Ерригача Россера тӏема операце ветеранаш, гӏо деш лелараш гуллургба цига, Россе керда моттигаш а юкъе йолаш. 100 саг хургва кхетаче дакъа лоацаш. Царех ах моттигаш СВО доакъашхоша, «Турпалий ха», «Турпала никъ» яхача программашта юкъерча викалаша дӏалоацаргья, хӏаьта вожаш хатараш хиннача моттигашка къахьегаш болча, иштта кхыдолча гӏулакхашта юкъе дакъа лоацача гӏо дерашта лаьрхӏа я. 2024-ча шера республике йоаржаяь хиннача гӏо деш леларий Ерригача Россе кхетачен никъ дӏахьош болх ба ала деза цох. «СВО доакъашхой, ветераний болх гӏо деш хиларца бувзам болаш хургба. Кхетаченаш, гӏо деш бохьийташ бола кхоачам кийчбар, СВО доакъашхой дезалий оагӏув хьаллоацаш йола проекташ, иштта дукха кхыдараш хургда цу юкъе. Къаман программаца дувзаденнараш кхоачашдеш, болх ба ала йиш я цох.
«Россе Президента Путин Владимира массахана белгалдеш да, СВО доакъашхоша, ветеранаша шоаш ӏомадаьр, дайзар къонача тӏехьенца декъа дезилга. Ма дарра аьлча, книжкашка, лекцешка гӏолла ӏомалургдоаца хӏамаш да вай вахаре. Вӏаший тӏаотташ хилар, оагӏув хьаллацар, моллагӏа хӏама бехктокхаме дӏадахьа ховш хилар фуд кхетадеча нахагара ӏомадеш дола хӏамаш да уж! Къонача тӏехьенца кхетаченаш дӏакхухьаш, Даьхен хӏама лорадар, ший никъ яхь йолаш, деналца дӏабахьар мишта хила деза царна довзийташ хила беза тахан СВО доакъашхой. Из лоархӏаме болх ба тахан. Кхетачен болх, дукхагӏча даькъе, из деррига чулоацаш ба», - белгалдир вай мехкадас Келаматанаькъан Махьмуд-Ӏаьлас.
Из лоархӏаме кхетаче дӏахьоргья Мужеча уллача спорта кийчо еча моттиге. Дукха хӏама чулаьца программа я хьалхалаттараша кийчъяьр. Гойтама балхаш, тайп-тайпара кхетаченаш хиларал совгӏа, республикан ӏадаташ довзийташ йола спортацара яхьаш, культуран оагӏонцара кхетаченаш хургья цига.
Вай Мехкадас теркалдечох, массехк дийнахьа тоабанца болх дӏахьош хиларо мехка тайп-тайпарча моттигашкара нах вӏашкаозарал, вӏаший бувзам хоттарал совгӏа, кхетаче дӏакъайлачул тӏехьагӏа доакъашхоша йоаржаергйолча пайдане, беркате хургйолча проекташта никъ хьабелларгба.
