«ПРО.Блог» яха кхетаче хьайийллар ГӀалгӀайчен Магасе
Тахан ГӀалгӀайчен столице Къилбаседа Кавказа блогерий даькъ тӀарча хьалхале лелаерашта, моттигашкарча СМИ викалашта, зарбан болхлошта хьайийллар «ПРО.Блог» шоллагӀа кхетаче, из вӀашагӀъеллар ГӀалгӀай Республикан Кулгалхочун, Паччахьалкхен Администраце, «Машук» дешара Центраца цхьана, яхаш, дийцар «Сердало» газетага цу моттиге.
Ше моаршал хоатташ, ГӀалгӀай Республикан Кулгалхочун, Паччахьалкхен Администраце кулгалхочо Мархенаькъан Анзора белгалдир, СМИ лаьрххӀа дола дакъа дӀалоацаш хиларга хьежжа доацаш, блогераш болаш хилар дӀа ца лоархӀаш Ӏе хала да. Цун бахьан да, цар моллагӀа дола этта хьал сиха теркалдеш хилар.
«ДукхагӀча даькъе шух тийша да тхо а тхоай балха тӀа. Цудухьа доккха баркал ала безам ба са ер кхетаче вӀашагӀйоллаш дакъа мел лаьцача наха. Ер хӀанз вай шоллагӀа кхетаче я. Хьалхара форум дӀайихьар «Машук» дешара центре Пятигорске, цунца дувзаденна къаьстта баркал оал аз хьалхабаьннарий ерригача тоабанна. Беркате болх хилба шун, керда толамаш даха низ кхоачалба шун», - аьлар гулбеннарашка Мархенаькъан Анзора.
ЛоархӀаме дола хьалхара дакъа йистедаьлча, гулбеннараша дӀаболабир кердача медиа викалашцара дагабалара болх. Таханарча проектех дийцар блогера Тазеева-Гриценко Татьянас, журналиста Гого Ильяса, ЦхьоалагӀча канала болхло йолча Черницкая Евгенияс, автора-иллиалархочо Крупатин Николая.
Программа чудоагӀаш, хьалхарча дийнахьа «Кердадарашка гӀолла мах бараш: Мишта болх бе беза нахаца кердача медиа?» яха къамаьл хилар, говзанч-хьехамаш дир кхелахоша керда медиа блогаш вӀашагӀйохкара хьакъехьа.
