«Ангушт» команда «Астрахань» командаца ловзар дIадихьар, селхан Назране, Овшанаькъан Рашида цIерагIча стадионе. Къилбаседа доазон тIа, кхоалагIча лига футболах йола, мехка Хьалхлен матч яр дIахьош хиннар.

Укх наькъах «Ингфутбол. ру» сайта редакце яздаьчох, шоай киса яьлла котало дIаяхийтар назрановцаша.

Укхазара хьал дувцаш, ловзар дIадодача юкъа белгалдеш дар, Хаматхананаькъан Акромана, Экажанаькъан Ахьмада хьинарах чуяьккхача голах, вай команда хьалхарча таймах тешшаме ловзаш яр, чотага хьежача.

Ловзар йистедаьлча цифраш 2:0 яр, ангуштовций оагIорахьа совле а йолаш.

Бакъда, футбола юкъе йолаш йола салоIама ха яьнначул тIехьагIа, чот иштта хиларо вай команда массехк мелъялийтар.

Астраханцаша дагадоацар дир, цкъа хьалхагIа шозза бургац хьа а яьккха, цул тIехьагIа, цар коа наIарех бургац чу а яьккха. Турнирни мугIарера вай команда позице толхаянзар: из дIахо а цу тIа кхоалагIча мугIаре латт, хIаьта, селханара астраханций коталоно цар рейтинг тоайир. ХIанз, уж пхелагIча мугIаре ба, хьалхагIа ялхлагIча мугIаре хинна бале а.