Гӏалгӏайчен ГАСа Магасе дӏахьоргья пайдане семинар
29.09.2025 14:33
Гӏалгӏай Республикан Паччахьалкхен архива болхлоша ардара бетта 10-ча дийнахьа вӏашагӏйолларгья тайп-тайпарча говзанчашта семинар-кхетаче «Вӏашагӏтохар, кечдар, Гӏалгӏай Республикан паччахьалкхен архиве дӏачудала каьхаташ тоадар», яхаш, дийцар «Сердало» газетага ГАС зарбан болх лелабераша.
«Кхетаче дӏахьош гуллургба гӏалакхаш вӏашагӏдохкара бола болхлой, иштта архивни гӏулакха болхлой, каьхаташ лорадарах, уж дӏаяздарах, леладарах бехктокхаме бараш.
Тахка лаьрхӏад каьхаташ вӏашагӏтохара, кийчдара керттера гӏулакхаш. Каьхаташ дӏадалара уж лорадеш йолча паччахьалкхен моттиго дӏадехараш малагӏаш да белгалдоаккхаргда. Иштта гулбеннарашта цу балха дакъа гойтаргда, царна шоашта ховргдолаш тӏехьагӏа уж лерттӏача хьалашка леладе», - аьлар хоамо.
