1914-1990-ча шерашкара 27 кинокаьхат гучадаьлар Красногорске, ГӀалгӀай республикерча архива болхлошта
1914-1990-ча шерашца дувзаденна 27 лоархӀаме кинокаьхат гучадаьлар вай мехкарча Паччахьалкхен архива оагӀон болхлошта Россе паччахьалкхен киносурткаьхатий архиве (РГАКФФД). Из хоам «Сердалога» бир архива болхлоша.
«Вай Мехкадас Келаматанаькъан Махьмуд-Ӏаьлас тӀадилларах дӀаболабаь болх, толам болаш хилар тахан. Балха гӀулакха баха болаш, вай мехкахоша цига техкад 1914-1990- ча шерашца дувзаденна дола 27 каьхат, хьатӀадаьха шоашца хьаденад уж.
Иштта, 1942-1943-ча шерашка Къилбаседа Кавказа моттигашка лаьттача тӀема деношца бувзабенна киногойтам корабаьб царна. ЛоархӀамеча балхах да, 1920-1980-ча шерашца дувзаденна дола сурткаьхаташ.
Хьадувцачох, 1942-ча шера МагӀалбике лаьттача ЦӀеча Эскарца дувзаденна сурташ да цига. Ӏилманхоша геттара чӀоагӀа тохкаш латтарех да гӀалгӀай къаман вахарца, культураца дувзаденна каьхаташ.
Тохкама балха керттера декхар - ГӀалгӀай къаман истореца дувзаденнараш дийндар, лорадеш дӀахо дӀадахьар.
