Магасера гимнастка котъяьлар Мужеча дӀайихьача мехкашта юкъерча яхьашка
Магас-Шахьара гимнастка Ӏоахарганаькъан Ясина котъяьлар ММС «Халкъий доттагӀал» - 2026» яхача мехкашта юкъерча яхьашка, аьлар «Сердало» газетага спортсменкан викалаша.
«КӀимарса бетта 11- 13 деношка, Шолжа кхален Мужеча спортивно-Ӏомалуча центре шоай спорта говзал гойтар Москвера, Владимирера, Краснодарски а Пермски а краяшкара, иштта ГӀалгӀайчера баьхкача гимнасткаша. Царна могадаьдар ленташца спортивни халхараш гойтар (лента, бургац, гӀоз, иштта кхыдараш), дегӀа маьженаш ловзалуш хилар, артистизм хилар. Кхелахоша терко тӀаяхийтар техниканна а, цул а чӀоагӀагӀа - ловзар нийса дӀадахьара. Яхьашка дикагӀчарна совгӀаташ делар, дипломаш, дагалоаттама призаш елар.
Вай мехкахочо - Ӏоахарганаькъан Ясинас гойтар дика техника, лоӀам, лаьрхӀачунга кхоачаш хилар», - аьлар хоамо.
Тхога хоам баьчо яхачох, яхьаша гимнасткашта таро елар шоай спортивни боарам, говзал гойта.
