«Вахархочун карта» чуйоагӀаш я итт совгӀа йола моттиг. Из карта леладечун таро хургья цу оттигаша лу хьалаш цу картаца дувзаде. Из дукхача оагӀорахьа ахчанца дувзаденна сага гӀулакхаш чакхдаха йиш йолаш а да, леладеш атта а да. АргӀанара финансови шу хьатӀадоагӀаш республикан бюджете «Вахархочун карта» яхача проекта лаьрхӀа ахча хьожадергда», - аьлар Келаматанаькъан Махьмуд-Ӏаьлас шоай кхетаче йистейоалаш. Дийцача хаттарашта юкъедоагӀаш да деша дагӀача бераша, ишколашка хӀама яарах банка картага гӀолла ахча дӀалургдола хьалаш а. Из дикагӀа да, ахча шийца даим хиларал совгӀа, цу берий даьй-ноаной берий кхачанна тӀахьажара. «Халкъа Гулламе хьажа оттадаьд цхьаькха банка гӀулакх леладара дош а - нах дӀа-юха кхувлаш йолча транспорта билетах боагӀаш бола мах картага гӀолла дӀабалар. Таханарча денга кхоачаш, цу тайпара болх беш 19,4 процент мара яц вай транспорт. ЛаьрхӀачунга кхача 25% кӀезигагӀа йоацаш хила еза. Из аттагӀа да наха а водителашта а, цул совгӀа, наьха хьалаш а дикагӀа хургда», - аьлар мехка кулгалхочо. ТӀехьарча шерашка моттигерча программанна чудоагӀаш дола бахархоша ахчанца леладу гӀулакхаш дикагӀа кхетадара декхар дика кхоачашдеш латт. Келаматанаькъан Махьмуд-Ӏаьлас яхачох, ахчанцара гӀулакх лерттӀа леладе Ӏомабенна хилча, наха а банкацара гӀулакхаш дукхагӀа леладергда. Из пайдана хургда наха а мехка а.