Уж гулбалара бахьан дар, ГӏалгӀайчен Кулгалхочо Келаматанаькъан Махьмуд-Ӏаьлас, царна баркал а оалаш, гӀалгӀай паччахьалкхен 100 шу дузаш хиларца, иштта цар дика къахьегаш хиларца уж белгалбеш, царна юбилейни майдилгаш луш хилар.

«Массаза а дика хеташ, тӀаэц сага ше баь болх белгалбеш хилар, ший балха дика мах оттабеш хилар, къаьстта из мехка кулгалхоша кхетадеш хилар. Цо тешал ду профессионализм хилара, мохк дегӀабоалабе къахьегаш хилара, цо дӀахо а овсаре къахьегара тӀахьех.

Кулгалхой оагӀорахьара иштта теркам лоаттабаро кхы а дукхагӀа толамаш даха новкъостал ду», - аьлар «Сердало» газетага Республикан халкъа кхоллама цӀен художественни кулгалхочо АбдурзаковгӀар Аьсета, из а яр цу дийнахьа совгӀаташ лучарна юкъе. Цига хиннарашта дицлургдоаца цӀай хилар цох. Уж кхы а чӀоагӀагӀа къахьега кийча ба.