ГӀалгӀайчен Кулгалхочо жоп делар мехка бахархой хаттарашта
ГӀалгӀайчен кулгалхочо Келаматанаькъан Махьмуд-Ӏаьлас, телевидене йийллача эфире гIолла, республикан бахархошта дагадоахкаш долча хаттарашта жоп делар, 2023 шера баьча балха жамIа деш, яхаш, хоам бу «Сердало» газетага республикан кулгалхочун зарбан болх лелабераша.
«ДукхагӀа дола хаттараш дувзаденна дар социальни Ӏалашонца. Къамаьл хилар «Магас» НТРК, «Магас» НТРК телеграм-канала оагӀон тӀа, ГӀалгӀай Республикан Кулгалхочун оагӀон тӀа«Контакташка гIолла», иштта «Магас» радиога (88.8 FМ) гIолла», яхаш, дувц тхога кхаьчача хоамо.
Иштта ГӀалгӀайчен Кулгалхочунца йийллача эфире дакъа лоацаш бар ГӀалгӀай Республикан министрий кабинета викалаш. «Хьамсара республика бахархой! Баркал шоана шун хаттарех, оаш иштта, юстара ца дусаш, дакъа лацарах! Йийллача эфире гӀолла денна хӀара хаттар, жоп ца луш, дусаргдац», - аьлар Келаматанаькъан Махьмуд-Ӏаьлас, ше ГӀалгӀайчен бахархошка кхайкарал деш.
