Республикан Кулгалхо: «Путин котваргхиларах вIалла шеко яц».
Путин Владамир хоржамашка котваргхилар вIалла шеко юкъе йоацаш да, аьнна, белгалдир вай Мехкадас. Из хоам «Сердало» газетага бир Мехкадаь зарбан болх лелабераша. Республикерча избиркома белгалдечох, протоколий хьал техкачул тIехьагIа, 89,61% - га кхоачаш да Путина тIехьа кхадж тассар. Цо хьагойт, котало цунгахьа хиларца вIалла шеко йоацилга.
«Цу дикача гIулакхаца вай дерригаш даькъаладувца лов сона», - белгалдир Мехкадас, Россена лоархIаме долча хоржамех дувцаш.
Мехка кулгалхочо теркалдир, Путин Владимир берригача мехка лоархIаме дола доккхий гIулакхаш, декхараш хила боаггIача боараме кхоачашдеш, массахана ший низ хьагойташ хьавенилга. Цудухьа тахан берригаш тешаш ба, Федеральни Гуллама хьалхашка президента оттадаьрашца вай мохк политически, экономически дикка чIоагIлургхиларах.
Келаматанаькъан Махьмуд-Iаьлас белгалдир, тахан Россеца моастагIал лаца гIерташ, санкцеш тIаийеш болчарна духьалъотташ, мехка хьал хIара денна тоадергдараш юкъекхувлаш, хьинаре къахьегаш; Путина, низ бола паччахьалкхе яь, Росси дIаоттаяьлга.
«Россе къамашта юкъера бувзам, барт чIоагIбаьб Путин Владимира. Цо хьагойт из, ше кулгалду паччахьалкхе тоаеш, цун низ чIоагIбеш хьавоагIилга», - белгалдир вай Мехкадас Росси иразе, маьрша латта даькъала ювцаш.
Доккха баркал аьлар республикан кулгалхочо хоржамашка дакъа лаьцача мехкахошта, из мел лоархIаме гIулакх да теркалдаьрашта.
