АвтоВАЗ 60 шу дизарца даькъалайийцар вай Мехкадас
60 шу дизарца АвтоВАЗа болхлой даькъалабийцар вай мехкадас Келаматанаькъан Махьмуд-ӏаьлас. Укх тӏехьарча шерашка дикка чӏоагӏбеннаб вай мехкаи автоконцернаи юкъера бувзам. Цу оагӏонца лоархӏаме моттиг дӏалоацаш хилар 2021-ча шера маьцхали бетта республике керттера дилер LADA оагӏув «Магас – Лада» хьаеллар. Цу заводо арахецаш йола хӏамаш тахан вай мехкахошта юкъе дикка яьржа, дика лоархӏаш, маьха а еза йоацаш я.
«Цу оагӏонца лоархӏаме моттиг дӏалоацаш да къонабарий шоай гӏулакх дикка шаьрде аьттув хургболаш къахьегар. 2023-ча шера вай мехка венача хана, АО «АвтоВАЗ» президентаца Соколов Максим Юрьевичаца юкъера бувзам чӏоагӏбара тӏехьа кхоачашде дезараш белгалдир оаха.
Къона болхлой кийчбеш, студенташта юкъе из говзал йоаржаеш, бахархошта болх бе моттигаш ӏалашъеш къахьега дезилгах дийцар. Тахан цу балхага гӏолла пайда хиннилга гуш да вайна. Вай мехкара кагирхой тахан Тольяттерча заводе из говзал ӏомаеш, цига болх шаьрбеш къахьегаш ба.
Мехка эггара йоккхагӏа йолча завода тоабан юкъе къахьегаш ба уж. Цу гӏулакхо хьагойт, российски йоккхача компанеца мехко бувзам лоаттабар къонабарашта, ерригача республиканна пайда беш а диканна а долга», - язду вай мехкадас ший Телеграм-оагӏон тӏа.
Дӏахойодача хана шоай хӏама иштта тоадеш, аьттонца, беркатаца къахьегаш лакхаленашка кхача, толамаш даха даькъалабийцар АвтоВАЗе къахьегараш вай Мехкадас.
