Гӏалгӏайчен Кулгалхочо хьехархочун Денца даькъалайийцар хьехархой юкъарло
Гӏалгӏайчен Кулгалхочо Келаматанаькъан Махьмуд-Ӏаьлас кхайкарал дир республикан хьехархошка цар балха цӏайца дувзаденна, царна баркал оалаш. Цо белгалдир цар къахьегам къаьстта лоархӏаме хилар. Цо яхачох, бокъонца вола хьехархо - из духхьал шийна ховр дӏаденна ӏеш вац, из ва хьехамча, хьалхалаттар, шийна тӏехьабаха ховр. Хьехархочун масало кхувш йоагӏача тӏехьенна гойт дика, бехктокхаме, боккхагӏбараш лоархӏаш хилар мишта хила деза. Хьехархоша новкъостал ду берашта вахара нийса никъ хьалаца, уж тешшаме дӏабуг цо дӏахо лаьрхӏачунга.
«Хетаргахьа, вайх хӏаране ва вӏалла вицлургвоаца хьехархо. Дагайоагӏа цун оаз, бӏарахьажар, цо беш хинна хьехам, цхьайолча хана кхыметтел къаьстта дола дешаш. Шераш дӏа мел долх, вай кхетаду уж мел лоархӏаме хиннад. Тахан Гӏалгӏайчен дешара даькъ тӏа болх беш ва 6 эзар хьехархо. Хьехархой балха говзал лакха хиларо таро лу республикан, ерригроссийски боарам тӏа цар болх безбе. 600 совгӏа саг «Гӏалгӏай Республикан цӏихеза хьехархо ва», 34 «Шера хьехархо» ва, профессиональни яхье котваьнна. Баркал шоана сатем болаш, сабаре хиларах, берашта иштта дика кхетам луш, уж дика кхедеш шо хьадоагӏаш хиларах. Хӏаьта ший балха никъ кхоачашбаь дӏаваьннар, вусаргва даим ишкола вахара цхьа дакъа хинна. Къаьстта баркал хилда къахьегама шераш дӏадахьарах, шоай гӏулакх иштта дезаш леладарах. Шун хьаькъала говзал тхоца хургья даим», - аьлар, ше кхайкарал деш, Келаматанаькъан Махьмуд-Ӏаьлас.
Республикан Кулгалхочо ловца баьккхар Гӏалгӏайчен хьехархошта; даим хьинар долаш, дезале паргӏато йолаш, могаш дахалда шо, аьнна. Из тешаш ва, цар кхетам беннача наха каст-каста шоай толамашца уж гӏадбугаргхиларах.
