Гӏалгӏайчен Кулгалхочо республикан къона эскархой цар цхьанкхетара юбилейца даькъалабийцар
Гӏалгӏайчен Кулгалхочо Келаматанаькъан Махьмуд-ӏаьлас даькъалабийцар «Къонача эскара» болама доакъашхой, цар даьй-ноаной, хьехамчаш, цу цхьанкхетара 10 шу дизарца. Из хьакхеллар РФ Президента дагадохарах. Укх шерашка мехка доакъош дегӏадера, 8 эзаргара 24 400 сагага кхоачаш. Гӏалгӏайчен къона эскархой шоай нийсархошта масала гойташ ба, цар дакъа лоац патриотически, волонтёрий проекташка.
«Хӏара таьрахьа тӏехьа латт шоай балха чуийнна дола бераш, цар хьехамчаш, дезал, республикан хургдолчун цар юкъедахьаш дола дакъа. Гӏалгӏайчен къона эскархоша дика дакъа лоац патриотически боламашка, вӏашагӏкхетарашка, спортивни яхьашка, дешара кхетаченашка, уж ӏомалу бехктокхаме хила, тоабашца цхьан болх дӏабахьа, шоай Даьхе еза. Къаьстта баркал оал аз хьехархошта, хьехамчашта уж кхебеш цар низ, хьинар дӏадаларах. Беррига Гӏалгӏайчен къона эскархой даькъалабувц цар юбилейца! Дукха дика гӏулакхаш нийслулда шоана хьалхашка! Оаха доккхал ду цар вай республикан хургдолчун юкъе доккха дакъа дахьаш хиларах!» - йоах республикан кулгалхочо, уж даькъала бувцаш.
Къонача эскархой шераш хьалдизад дицлургдоацача дикача гӏулакхех: наькъа бахарах, иллеех, цӏера юхе багӏарах, хьалхара спортивни толамаш дахарах, Коталон параде дакъа лоацаш хиларах - из деррига царга гӏолла чакхдаьннад.
Цу боламо новкъостал ду дешархошта нийсхон тӏехьа болаш, сий долаш, цӏена хьалкхера, моллагӏча хана новкъостала бахка кийча болаш уж хилийтара. Гӏалгӏайчен «Къона эскар» вахара тешшаме къулба хинна дӏаэттар, цо ӏомабир доттагӏал леладе, шоай мохк беза.
