«Цаӏ йолча Россе» бийсанарча кхетаче дакъа лоацаш хилар вай Мехкада
«Цаӏ йола Росси» яхача партена хьалха латтача Медведев Дмитре селхан бийсан дӏайихьача онлайн-кхетаче дакъа лоацаш хилар вай мехкада Келаматанаькъан Махьмуд-Ӏаьла. Кхаь дийнахьара Паччахьалкхен Думан, моттигерча парламента хоржамаш дӏакъайлачул тӏехьагӏа, дӏахьош яр из лоархӏаме кхетаче. Берригаш чулоацаш йола кхетаче хилар цох.
Российски Федерацена чуйоагӏаш мел йолча моттигий кулгалхой бар дакъа лоацаш хиннараш. «Медведев Дмитре белгалдир хоржамий моттигаша шоай болх боаггӏача боараме, бокъоно къоастадаьча тайпара дӏабахьар эггара керттера долга. Иштта цо теркалдир, тахан белгалдечох «Цаӏ йолча Россе» ший хӏама лертӏа дӏадихьалга, мехкара бахархой из парти хьаллоацаш болга.
«Медведев Дмитре хьоахадир, нах тӏехьа хилар – царна хьалхашкара декхараш дизза кхоачашдеш, болх боаггӏача боараме дӏахьош хила безилга долга», - аьлар Келаматанаькъан Махьмуд-Ӏаьлас.
Вай Мехкадас белгалдир, республике хоржамаш цхьаккха кхоачамбоацар доацаш, боаггӏача боараме дӏадихьалга. Иштта республикан Кулгалхочо тӏатехар, кхадж тассар лоархӏаме декхар долга кхетадеш, дӏахойодача хана мехка, наьха вахарера гӏулакхаш тоадара тӏехьа къахьегаргдарашта шоай кхадж тасса бахархой ловш хиннилга.
