«Массазарча мехка цхьоагӀо Ӏалашъяра къахегаш йолча координационни совещанена чудоагӀаш, ладийгӀар 2023 шера баьча балхага. Из чӀоагӀа лоархӀаме къамаьл да, вай зӀамигача республиканна.

Денгара ди массаза дала, вай зӀамигача республике машинаш тӀакхеташ хиларга хьежжа доацаш, ДТП цхьа дакъа юхатоха вӀаштӀехьадаьннад, бакъда беррига низ тӀабахийта беза, наькъа бокъонаш лора ца яр бахьан долаш хулача хатарех нах леш хилар юхатохара. Моттигерча Ӏаьдала, бокъонаш лораерий керттера декхар да наьха сакхетам лакхбар, ма хулла дукхагӀа наьха вахар лорадар, наькъа хулаш дола зуламаш юхатохар», - аьлар Келаматанаькъан Махьмуд-Ӏаьлас.

Цо иштта белагалдир, юкъара болх бераш, дин викалаш, СМИ цу гӀулакха юкъейоале езаш хилар. Геттара терко тӀаяхийта езар да, бераш чудагӀача машинашка увттадеш дола гӀандаш леладар, цу тайпара берашта кхерамзле Ӏалашъяь хургья. Цунца цхьана, зӀамига долча хана денз, берашта хьалхадоахаш хила деза наькъа бокъонаш лорае езилга, уж хьалкхеде деза гӀашлой бокъонаш йовзаш, уж лелаеш хургдолаш, машинах лорадалар царна довзийташ.

Кхетаче дӀахьош, дӀадахача шера хиннар белгалдир: 2023 шера 407 эзарзза совгӀа административни бокъонаш телхаяьй. Цу юкъе 195 ДТП я. Белгалду, 2022 шерга хьежача ДТП кӀезигагӀа яле а, нах бовш йола моттигаш дукхагӀа хилар. Республикан наькъашка зуламаш хургдоацаш, болх дӀабахьар цу гӀулакхах бехктокхаме йолча органий керттерча декхарех цаӀ да.

Цу юкъе, ший дакъа лоацаш, хила веза вайх хӀаравар, иштта лорае еза новкъа лелара бокъонаш, шоаш а гонахьарбараш а лорабеш.