ГӏалгӀайчен Кулгалхочо, Iаьржача хицара хьал нийсдаларах, кхетаче дӀайихьар
ГӏалгӀайчен кулгалхочо Келаматанаькъан Махьмуд-Ӏаьлас сихача боараме кхетаче йир, догӀаш дийлха этта хьал дIадерзадара дешаш дувцаш. Цига белгалдир; Паччахьалкхенца, МЧса викалашца, иштта Илдарха-Гӏалан, Шолжа кхален администрацей кулгалхошца; наха хий чудаьнна хиларах этта чоалхане хьал юстардаккхара де дезар. Къаьстта терко тӀаяхийтар Эбарга-Юрта, цун чудоагӀача доазонна, яхаш, дийцар «Сердало» газетага мехка Паччахьалкхено.
Тхога хоам баьчо яхачох, Ӏаьдала балха керттердар да наха кхерамзлен Ӏалашо яр, хьалхара новкъостал дар, хий дӀагӀоргдола моттиг меттаоттаяр.
Цу хьалех бола болх лелабеча боахамаша яхачох, хий кӀеззига лаьгӀлуш доагӀа. Этта хьал тоадара дикка низ оарцагӀбаьккхаб. Цу моттиге ден-бус болх беш 100 говзанча, 30 гаргга лаьрххӀа йола техника я, цар цахаддаш болх дӀахьу жагӀах, кхыдолча гӀирсех сунташ деш, хий лаьгӀдара а дӀадахийтара а.
Цига из хаттар дувцаш Келаматанаькъан Махьмуд-Ӏаьлас бехктокхаме болча боахама кулгалхошта тӀадаьхкар цхьацца дола декхараш. Лоаццача хана зе хиннача нахацара болх баь баккха беза, дӀахо царна новкъостал дергдолаш. Цул совгӀа, цо хьалхадаьккхар хицара хьал юстардаккхара тӀахьожам лоаттабе безилга.
Цунца цхьана Шолжа кхален Эбарга-Юрта дӀахо дӀахьош ба хий дӀадахийта новкъостал ду болх.
Хӏанз укх сахьате, цу даькъ тӀа хин турбаш чуйоахкаш латт. Кердача инженерни гIирсаша таро лургья тешшаме, новкъарло йоацаш, даькъ тӀара хий арадаккха.
