Гӏалгӏайчен Кулгалхо хьежар, Магӏалбика кхале ялат чуэцаш дӏахьоча балхага
Гӏалгӏайчен кулгалхо Келаматанаькъан Махьмуд-Ӏаьла хьежар Магӏалбика кхале ахархой моттигашка, фермерий боахамашка ялат чуэцара болх мишта дӏахьу. Из хьежар ялат мишта хиннад, иштта цо къамаьл дир болхлошца.
«Юххьанца из вахар Южнерча «Беркат» оалача ООО. Предприяти укх 30 шера а ка бола ялат, баьцадаараш, кхыйола культураш лелаеш ба, цул совгӏа республикан юртбоахамашта юкъе а хьалхале лелаерех ба. Карарча хана боахаме чуэцаш да гурахьа дӏадувш дола ялат. Из культура дӏайийннай 240 гектара тӏа, царех чуийца яьннай 86 гектар, цига хьувкъам гектара тӏара 32 центнер хилар. Деррига а ялат дӏадувш леладу лаьтта 2400 гектар да, царех 940 гектар ялат дӏадийнад. Баьцадаараш хиларал совгӏа, «Беркат» ООО дегӏадоаладу хьайбаш леладара гӏулакх а. Цу боахаме хӏанз 1000 жа да, баьцовгӏаш лелаяра даькъ тӏа юхакъаьста продукци цу жена лоаттаю доакъара меттел, цо таро лу, юхакъасташ хӏама а доацаш, из боахам лелабе», - аьлар «Сердало» газетага мехка кулгалхочун зарбан болх лелабераша.
Республикан Кулгалхо, цхьаькха цхьан боахаме а вахар цу дийнахьа. Из ба Соагӏапча вахача Исмейланаькъан Ӏийсай КФХ. Из боахам дика дегӏабоагӏаш ба укх ткъаь итта шера. Махьмуд-Ӏаьла хьежар цига ялат чуэцаш дӏахьош болча балхага. Лаьтта укхаза, цхьа хӏама юха ца коасташ, леладе хьож - деррига 414 гектар лаьтта даим леладеш да. Хӏанз ахархой мукх чуэцаш ба 244 гектара тӏара, 70 гектар чуийца баьннаб, цига ялат дика хиннад, гектара тӏара 26 центнер йоалаш. 170 гектара тӏара кӏа чуэца болалургба кӏеззига тӏехьагӏа.
Ше вахача наькъа дайнар, дика мах оттабеш, тӏаийцар Келаматанаькъан Махьмуд-Ӏаьлас. Мехкара ахархой аграреш дика кийчо яь ба ялат чуэца, догӏаш латтарах хьувкъам дика хилар. Цо белгалдир, республико юртбоахам лелабара, эшача техника, ГСМ, кхай тӏара балхаш дӏадахьара ахча луш хилар, хӏана аьлча АПК республикан экономикан керттера дакъа да.
