Гӏалгӏайчен Кулгалхочо Магасе РФ, Гӏалгӏайчен паччахьалкхен совгӏаташ дӏаделар
ГӏР Кулгалхочо Келаматанаькъан Махьмуд-Ӏаьлас РФ, Гӏалгӏайчен паччахьалкхен совгӏаташ дӏаделар дика къахьегаш, лоархӏаме декхараш кхоачашдеш болча наха, яхаш, дийцар «Сердало» газетага республикан кулгалхочун зарбан болх лелабераша.
Совгӏаташ делар шоай балха тӏа дика къахьегаш, профессиональни говзал, республика, еррига России дегӏайоалае шоашкара дакъа юкъедахьаш хьабоагӏача наха.
«Тахан лакха совгӏаташ делар лорашта, хьехархошта, культуран болхлошта, журналисташта, ӏилманхошта, кӏалхарбоахарашта, ӏаьдала моттигий викалашта, бокъонаш лораерашта, юртбоахама болхлошта, энергетикашта, кхыча боахамашка къахьегаш болча наха. Хӏара цӏера тӏехьа латт дукхача шерашка баь болх, лакха балха говзал, наха хьалхашка бехктокхаме хилар.
Геттара белгалдоалаш да, уж совгӏаташ далара ди республикан Ди долаш нийсдалар. Гӏалгӏайчен истори хьакхоллараш къаьстта цу тайпара нах ба - начӏал дола, къахьегама тӏера бола, шоай Даьхе езаш бола», - аьлар Макшарипа Махьмуд-Ӏаьлас.
Цо дег чура даькъалабийцар совгӏаташ лураш, баркал аьлар царна иштта бехктокхаме шоай балха моттиг дӏахьош хиларах.
Россе Президента Амарах совгӏаташ деннарашта юкъе яр нана турпалхо Боканаькъан Марем, Дзахкенаькъан Хадижат, Таймасханаькъан Аьсет. «Нана-турпал» яха сийдола цӏи елар царна. Царех хӏараяр дукхача берий нана я, дезал кхебара шийгара дика масал гойта а я.
«Даьй сий» яха орден елар Гаьгенаькъан Мухьмад-Башира, Гаьгенаькъан Танзилайна.
Республикан Кулгалхочо уж нах дег чура даькъалабийцар, царна дика ловца а баьккхар.
