ГӀалгӀайчен Кулгалхочо дийцар, туризм дика дегӀайоагӀаш хиларах
Туристически даькъ тӀара хаттар делар гид-экскурсовода Чомаканаькъан ӀаддаллоахӀа. «Нахацара бувзам» яха передача дӀахьош, цо республикан Кулгалхочунга аьлар, мехка санитарни доазонаш, гостиницаш, кхача кийчбу моттигаш тоъаш яц.
Келаматанаькъан Махьмуд-Ӏаьлас ший аргӀагӀа дийцар «Туризм, хьаьша тӀаэцара хьал» яха къаман проект юкъеяккхарах, туризм дика дегӀайоагӀаш хиларах. Масала, санитарни модулаш оттаяьй Бейне, Ольга тӀа, ЦӀай-Лоам тӀа, Наьсаре.
Гостиницай кепара керда гӀишлош хьалъеш латт – ГӀалгӀайчен столице болх беш я ӀТ–отелаш 40 моттига лаьрхӀа, дӀахо Гуцаранаькъан Микаила чотах гостиницаш хьалъергья Магасе, Наьсаре. Иштта ЦӀай-Лоам тӀа, хьатӀадоагӀача шера хьалъе йолаергья пхе седкъан отелаш. Карарча хана, хьакхоллаш я модульни таронаш.
Иштта дика дӀахьош ба «Ӏарамхи» ВТРК дегӀаяра болх, дегӀадоагӀаш да кемпингий доазонаш, альпинизм. Келаматанаькъан Махьмуд-Ӏаьлас яхачох, туризм дегӀайоалаяра хьал дикача боарам тӀа латт.
