Путина белгалдир, хьинар долаш, кердадараш кхолла кийча болаш, майра къонабараш юкъебаларо вай Россе вахар тоадергда, аьнна.

В. В. Путино белгалдир дIахо ше къамаьл деш ерригача Российски Федераце гIолла хила деза къонабараш хьаллацара дола хьалаш, аьнна.

Путин Владимира, къонабарашца дIахьоча балха цхьаккха а доацар, ца эшаш дар юкъедаьккха хила йиш яц, аьлар.

Цо иштта белгалдир российски къонабарий шо-шоай тайпара да динца дувзаденна а, иштта кхыча тайпара Iадаташ дола а вахар, деррига чулоацаш хила деза из, аьлар цо дIахо.

Вайна хьалхашка латтар дукха болх ба къонабараш а, иштта тIехьа тIадоагIаш дола ноахал а кхедара бе безаш, ма дарра аьлча, къаьначарна когаметта дIаоттаргбола нах кийчбе беза вай, царна говзал лакха йолаш шоай болх дIабахьа а, иштта моллагIа хьалхашка оттадаь декхараш кхоачашде а ховргдолаш, вай мохк дегIабоалабара, из нийсача наькъ тIа лелабе хара дола хьаькъал царна дIадала деза. Геттара а теркам тIабахийта безар да, дешара наькъаш, вахара оагIонаш кийчъеча, хIара сага ше лаьрхIар кхоачашде таро хургйолаш, ший балха тIа толамаш даха, ший республикан а, иштта берригача мехка а накъавоалаш хилар, аьлар президента, хьалхарча аргIах оттадеш дар белгалдоаккхаш.

Келаматанаькъан Махьмуд-Iаьлас белгалдир, шоай лоIамагIа гIо деча кагирхой гIулакх, иштта къонабарий дешарца дувзаденнар хьалхарча мугIарах латта дезаш да, аьнна, къона говзанчаш вай кийчбарца, таро хургья дуккхача хана денз лийрхIачунга кхача, уж оагIонаш тахан белгалъяьй Россе.

ГIалгIайчен кулгалхочо, къонабараш тахан геттара эшаш ба, аьлар, из я вай хургдолчун ганз. Къонача россиянаша шоай хьамсара мохк дегIабоалабара шоашкара дакъа юкъедахь. Цар шоай лоIамагIа къахьегарах, дукхача моттигашка накъабоалаш, тахан доккха дакъа лоац массанахьа. Цар чIоагIа новкъостал дир лорашта, ковид оала лазар даьржача хана, лаьххIа дола новкъостал лоаттадир цар больницашта а иштта лаьрххIа йолча службашта а, хIаьта хIанз укх сахьате цар доккха новкъостал лоаттаду Донецкера, Луганскера, Херсонски областера бехача наха.