Тоае езача Яндарерча № 3 йолча ишкола хьал тохкаш хилар гӀишлоъерий кулгалхо
1963-ча шера хьалъяь ишкол я Яндареръяр. 2013-ча шера тоаеш болх дӀабихьар цу чу. Карарча хана, «Дешара хьал тоадар» яхача паччахьалкхен программага гӀолла дикка кулг тохаш, из тоае лаьрхӀа ба мехка. Ишкола хьал тахка ваха хилар гӀишлон балхех йолча гӀишлошъяра хьалхалатта Иленаькъан Муса.
Ишкол шин оагӀонна йийкъа латт. Таханарча дийнахьа 275 бера лаьрхӀа йолча цу чу дешаш ва 456 дешархо. ТӀера барзкъа хьалъолла моттиг, кхетаченаш дӀакхухьа а спорта лаьрхӀа а залаш яц цига тахан. Ишкол тоаеш болча балхаца юстардаха лерхӀ уж кхоачамбоацараш.
«ЙӀовхал лоаттаю гӀирсаш, хин турбаш, цӀи яьлча хоамбергаш хувцаргья ишколе. Керда наӀараш оттаяь, кӀалхара кӀийле хийца, чура пенаш шаьрдеш, кулг-юхь дулача моттигашкара хӀамаш хувцаш, боккха болх ба дӀабахьа лаьрхӀар.
29,5 млн сом ахча да цу гӀулакха хьакъоастадаьр. Из болх чакхбоаккхаргбола гӀишлон балхаш леладу моттиг хоржаш, каьхаташ кийчдеш ба карарча хана министерстве.
БӀаьстан шоллагӀча бетта дӀаболабергба болх, Дала аьннадале. Керда дешара шу хьаотталехь, бераш чуэца кийча хила езаш я ишкол», - дийцар министерстве.
2025-ча шера мехка тоае лерхӀ кхы а ялх ишкол, шиъ берий беш. 521 млн совгӀа рузкъа да цу гӀулакха хьахьожадаьр.
