1,125 млрд сом ба паччахьалкхен кредитий боарам
2030-гӏа шу тӏакхачале 1,125 млрд сомага кхоачаш кредиташ могадарах тарра, доккхий хувцамаш дӏадоладергда мехка. Республике лоархӏаме йолча проекташка дӏадахийта лерхӏ из рузкъа. Тахан инженерни, коммунальни оагӏонцара балхаш, мехка пайда бергбола моттигаш хьаеллар лоархӏаме да цу ахчах.
«Россе экономически хьал тоадарах йолча Министерствон кулгалхочун гӏонча волча Назаров Сергейца дӏайихьача кхетаче дийцар цу оагӏонцарча гӏулакхех. Федеральни оагӏоно лоаттадеш дар пайда хургболча тайпара дӏа-хьа хьожадар керттерча декхарех да тахан. Республиканна могадаь долча ахчан лакха терко е еза. Проектий хӏама къоастаде, ше-ший аргӏагӏа болх дӏаболабе йиш хургйолаш, массадолча хӏаман кийчо е, аьнна, тӏадиллад аз. Къаьстта терко еш дийцар оаха Сбербанкага гӏолла инвесторашта кредиташ хилийтарах. Тӏера йоал эцаш луча ахчанга гӏолла бизнеса хӏама оттабаьча боарамал лохагӏа соцам болаш дӏадахьа йиш я. Тахан йоаржаяьча проектий болх пайда болаш дӏабахьа, иштта кердача инвестицей проекташцара хӏама тоаде аьттув луш гӏулакх да из», - язду ший телеграм-оагӏон тӏа вай мехкадас Келаматанаькъан Махьмуд-Ӏаьлас.
Массехк лоархӏамеча проектага гӏолла болх дӏахьош ба тахан вай мехка. Цу юкъе да кӏалах еча хӏамай кластера болх тоабар, 280 млн сом ахча дӏалоацаш йолча, вахаре хӏара денна санитарни оагӏонца эша кхоачам арахецаш йолча моттигага болх дӏаболабайтар. 90-95% -га кхоачаш кийча я из моттиг, карарча хана дисар эшаш бола кхоачам эцар да.
Иштта йоаржае лерхӏ хин, тока оагӏонашцара проекташ, хиш цӏендеш йола моттигаш хьаеллар, индустриальни парк хьалъяр да лоархӏамеча гӏулакхех. Хьалхара кийчо еш, мах къоастабеш, иштта кхыдарашка хьожаш, болх дӏахьош ба тахан. Региона кулгалхочо белгалдир, федеральни оагӏоно вай мехка дикка гӏо делга. Тахан керттердар пайдане, лоархӏаме йола проекташ хьахаржар да. Хӏара проекта болх лакха тӏахьожам болаш, ахча кходеш, боаггӏача боараме дӏадохийташ, деррига гуш долаш хила беза.
Федеральни оагӏонцара хӏама наха болх бе моттигаш ӏалашъеш, мехкара экономика тоаеш, регионера гӏулакхаш меттадоаладеш йолча проекташка дӏадахийтара къаьстта терко ергья, яхаш, дийцар вай мехкадас Келаматанаькъан Махьмуд-Ӏаьлас.
