Гӏалгӏайченна хьаелар академика Курскенаькъан ӏадрахьмана архив
Гӏалгӏайчен Паччахьалкхен мехктохкама музея ганзашка кхаьчар цӏихезача ӏилманхочун-сейсмолога Курскенаькъан ӏадрахьмана ӏилман балхаш чудоагӏаш бола гуллам , геолого- минералогически ӏилмай доктора, профессора, Казахстана НАН академика доалахьара хӏамаш, уж цун васкетага хьежжа хьаера ӏилманхочун исторически мехка.
«Архива чудоагӏаш да ӏилман балхаш, совгӏаташ, ӏилманхочун доалахьара каьхаташ. Курскенаькъан ӏадрахьмана керттера къахьегам- «Казахстана доазон тӏарча лаьттан чӏора петрофизика» - чӏоагӏа лоархӏаме лоархӏаш ба, дукхача ноахалашта накъабоалаш а ба, цун балхашта таржам даьд кхыча мехкашка, иштта уж кепа теха ара а хийцад», - аьлар «Сердало» газетага Гӏалгӏайчен Паччахьалкхено.
Музея юкъарлон викалаша белгалду, Курскенаькъан ӏадрахьмана ший доалахьара архив хьаялар - из геттара лоархӏаме ганз музея тӏакхеташ хилар да. Цу тайпара мах бола хӏама тӏакхеташ хиларо музейна хьалхашка керда таронаш хьаелл. Уж каьхаташ, сурташ, доалахьара хӏамаш хилар дика кӏийле я ӏилман-тохкама, экспозице болх дӏахо дӏабахьа. ӏилман- практически кхетаченаш дӏаяхьара а дика гӏирс ба из.
Цо иштта таро лу, Курскенаькъан ӏадрахьмана сейсмологена юкъедена доккха дакъа дагалоаттаде. Цул совгӏа, архиво гӏо дергда Гӏалгӏайчен тохкамхошта керда ӏилма лакхаленашка кхача.
