Гӏалгӏайчен тӏахьожам болаш да 12 къаман проект кхоачашъяр
Гӏалгӏай къаман проекташ, федеральни программаш кхоачашъярах дийцар, республикан премьер-министра Сластенин Владимира кулгал деш, аргӏанара кхетаче дӏахьош.
Цу даькъ тӏара хьал довзийташ, керттера доклад йир проекта болх лелабара йолча моттигерча урхаллен кулгалхочо Малсаганаькъан Бек-хана.
«Республике къаман проекташ кхоачашъяра лаьрхӏа ахча да 5 млрд 738 млн сом. Тов бетта 14 ча денга кхоачаш бюджета декхар тӏаийцад 5 млрд 445 млн сом, из да дерригача ахчан тӏара 95%. Кассе гӏолла дӏадахар 4 млрд 127 млн сом да- 72%. Россе Минфина хоамаша яхачох, тов бетта 8-ча денга кхоачаш, республике къаман 8 проектах ялх кассе гӏолла кхоачашъяр дӏалаьрхӏача, из хьал Россе гӏолла долчул дикагӏа да. «Дезал», «Кагирхой, бераш», «Дӏаьха, дика вахар», «Вахара хьалаш», «Экологи», «Пайдане йола экономика» яха проекташ кхоачашъяра болх лакхача боараме ба», - аьлар «Сердало» газетага Гӏалгӏайчен Паччахьалкхене.
Карарча хана Гӏалгӏайче юкъе я 12 керттерча къаман проекта, царна чуйоагӏа дарбанче, дезала вахар хьаллацар, дешар, экологи, инфраструктура, таьрахьий дегӏаахар. Паччахьалкхен кхетаче чакхйоалаш бюджета ахча нийса хьожадеш, йилла балха ха лораеш хилара керттера гӏулакхаш белгалдир.
РФ Президента Путин Владимира могаеш йола къаман проекташ кхоачашъяр, моттигерча Кулгалхочо ший теркама кӏал лоаттаду.
