ГӀалгӀайчено, ДНРо барт баьб парламенташта юкъера бувзам лелабе
ГӀалгӀайчен Халкъа Гуллама викалаш, шоашта керте цун кулгалхо ТӀумхой Мухьмад волаш, баха хилар Донецкерча Халкъа Республикан парламентаца бувзам чӀоагӀбе, яхаш, хоам бу «Сердало» газетага. «ДНРа Халкъа Совета кулгалхочунца Жога Артемаца кхетаче дӀахьош, парламенташта къера болх чӀоагӀбара долча каьхата кулг яздир, цунна юкъедоагӀа болхлой экспертни тоабай, шоайла вӀаший бувзам лелабара тӀахьожам лелабеча комиссей цхьана кхетаченаш дӀаяхьар». Иштта шоайла бувзам лелабергба аналитически, хаттарий-хоамий, методически материалашца.
Жога Артема гулбеннарашта баркал аьлар. «Белгалдаккха безам ба, Донецка Халкъа Республико ГӀалгӀайченца доттагӀала бувзам лелабелга. ГӀалгӀайчен бахархой дакъа лоацаш ба лаьрххӀача операце, цул совгӀа, массахана гуманитарни новкъостал а лоаттадаьд бӀухошта, Донбасса бахархошта», - аьлар парламента спикера.
ТӀумхой Мухьмада белгалдир, ГӀалгӀайчен кулгалхой Донецкерча Халкъа Республикан Ӏаьдала, бахархошта новкъостал лоаттаде кийча хилар: «Тахан ДНРа бахархой, СВО доакъашхой цхьана юкъара гӀулакхаш леладеш ба, оаха баркал оал царна, ма хулла уж хьаллаца а хьожаргда. ГӀалгӀайчено дика лелабу Донецки Республиканна гуманитарни новкъостал лоаттадара болх.
Кулгалхой хиларал совгӀа, дика дакъа лоацаш я гуманитарни новкъостал деча хана политически парти, моттигера бахархой, тхо дӀахо а из болх дӀабахьа лаьрхӀа да», - аьлар цо. Цу лоархӀамеча кхетачене, цар шоайла дагалоаттама совгӀаташ дӀа-юха делар; 2024 шера керда кхетаче дӀахьоргья, аьнна.
