Кавказа инвестицей кхетаче йолаш, ГӀалгӀайчено бартчӀоагӀам бир «РЖД» ОАОца
Шолжа-ГӀалий тӀа дӀахьош йолча Кавказа инвестицей кхетачене ГӀалгӀайчено кулг яздир, ГӀалгӀайи Нохчийи Республикай Паччахьалкхенашта юкъеи «РЖД» ОАОна юкъеи бувзам лелабар дувцача каьхата, яхаш, дийцар «Сердало» газетага ГӀалгӀай Республикан Кулгалхочун зарбан болх лелабераша.
Цига дакъа лоацаш хилар ГӀалгӀай Паччахьалкхен Председатель Сластенин Владимир, Къилбаседа цӀермашиний наькъа кулгалхо Задорин Сергей, Нохчий Республикан Паччахьалкхен кулгалхо ДаудовгӀар Мухьмад.
«Йоккха инвестице проект кхоачашъеш боаккхаш бола керттера гӀа ба из: нах а мухь а дӀа-юха кхухьаш йола цӀермашин Наьсаре-Шолжа-ГӀала оалача наькъ тӀа леларгйолаш, Сипсой-ГӀалани Шолжа-ГӀалани юкъера цӀермашинникъ меттаоттабергболаш», - аьлар ГӀалгӀайчен кулгалхочо Келаматанаькъан Махьмуд-Ӏаьлас.
Цунга хьежжа, кастлуш наькъаш хьаделларгда нах лела, мухь дӀа-юха кхахьа таро луш. ГӀалгӀай, нохчий мехкашта юкъе цӀермашина бувзам хиларах, паргӀатта дӀа-юха лела йиш йолаш хургба нах. Из проект кхоачашъеш, шинна а оагӀорахьа ТЭО кийчо ергья, цунга хьежжа дӀадодар а хургдолаш.
ГӀалгӀайчен Кулгалхочо, кхыча дукхача КИФа доакъашхоша санна, ше тешаш ва аьлар, цу тайпара йоккхий таронаш вахара юкъейоахаш хиларо, ГӀалгӀайчен транспортни даькъ тӀара болх кхы а дикагӀа тоабергхиларах, республикашта юкъерча транспорта болх шолханеца тоалургба, СКФО гӀолла экономически хьал дегӀадоагӀаш а хургда.
