Курски областе гӀо дахьийтар вай мехкара
Курски областе бахача наха 20 тонн совгӀа хӀамаш яхьийтар вай мехкара. Мехкадаь зарбан болх лелабераша белгалдечох, вахаре хӀара дийнахьа эшаш йола хӀамаш я яьшкашка йоахкараш.
Уж хӀамаш кийчъяра, дӀаяхьийтара болх шоашта дӀатӀаийцар мехкарча министерствоша, муниципальни моттигаша, иштта кхыбараша.
Хьаллаьцар из беркате гӀулакх мехкарча бахархоша а, иштта шоай оагӀонцара болх кхоачашбеш хилар МЧС болхлой. ГӀо дар цу тӀа соцаш дац. Цун тӀехьа араяьлар Донецки областе хӀамаш ийца йода машин. 20 тонн гаргга цӀена хий дихьар цигарча бахархошта.
«Халача хьале эттача мехкашта новкъостал лоаттадар дӀахо дӀахьош да вай. «Аьрзи» яхача вай лоаман лагере салаӀа Курски областера 50 бер тӀаийцар дукха ха йоацаш; хӀаьта тахан геттара гӀо эшарашта лаьрхӀа хӀамаш Ӏояхьийтар», - белгалдир вай мехкадас Келаматанаькъан Махьмуд-Ӏаьлас.
