Токмакски кхалерча берашта лаьрхӏа, 100 тӏормиг бохьийтаргба вай мехкара
«Ишколе даха кийчде бер» яхача боламга гӏолла, Токмакски кхалерча берий дог хьоасташ, эшаш мел бола кхоачам чубоалла 100 портфель бохьийтаргба вай республико.
«Токмакски кхалерча берашта, ишколе долхаш кийчо е новкъостал даьд вай хьалхагӏа а. Беркате ӏадат хинна чӏоагӏденнад из тахан вай мехка. Атта йоацача хана дахаш да къаьстта уж бераш, цудухьа цар дог хьастар, гӏо дар чӏоагӏа лоархӏаме да. Дешара шу дегагӏозаца, гӏадбахарца дӏадоладергдолаш, терко е еза вай царна тахан», - белгалдир вай мехкадас Келаматанаькъан Махьмуд-Ӏаьлас.
Республикан кулгалхочо хьоахадир, Токмакски кхален бахархой оагӏув хьаллацар наггахьа дӏахьоча боламех, проектех латташ доацилга. Цу моттигашкарча бахархой хьал аттача даккха хьожаш, тахан царна вахаре эггара чоагӏагӏа эшар фуд тохкаш, новкъостал лоаттадеш ба мехка. Цу моттигаца бувзам лоаттабар, хала долча хана могачох оагӏув хьаллацар, лоархӏамеча декхарех да.
