Гӏалгӏайчено вӏашагӏтохаргба СКФО къона театра болхлой
Гӏалгӏайче кийчлуш я мехкашта юкъера театрий «Къаман цхьоагӏо» яха кхетаче дӏаяхьа. Кхетачено цхьан майдан тӏа ерригача Къилбаседа Кавказа федеральни куран къона актёраш гулбергба, иштта режиссёраш, хӏама карагӏдоалаш йола кхоллама тоабаш. Из деш да Россе къулбехьен кагирхой театрай говзал дегӏайоалаяра, мехкашта юкъера бувзам чӏоагӏбара.
«Кхетаче кӏоаргга чулоацам болаш а, шин денна хетаяь а я- Россе халкъа цхьоагӏон, мехкашта юкъера культурах дола къамаьл лоархӏаме хилар белгалдеш; иштта Россе театра болхлой Союза 150 шу дузаш хилара, укх цхьа бӏаь ах бӏаь шера Даьхен сцена ӏадаташ лорадеш, уж дегӏадоаладеш йола моттиг я», - аьлар «Сердало» газетага Гӏалгӏайчен Паччахьалкхене.
Хила езача кхетачено хьагойт, мишта классически театра тӏехьале вӏашагӏкхет хьинарца, кердадарашца, кхоллама кердача ноахалца.
Из болх вӏашагӏбеллараша кийчъяьй дика программа. Цунна чудоагӏаш да говзанча хьехамаш, уж дергда хьалхале лелаеча театра хьехархоша, режиссёраша, йовхьамаш ловзаерашца, сцена тӏара говзал ӏомаярца, къамаьлаш дӏадахьарца дувзаденна хургда уж. Цига къона говзанчаш таро йолаш хургба вай заман моттигера театр дегӏадоаладара хаттараш дувца, кхоллама кхетаче дӏаяхьа, спектаклаш гойта.
Вӏашагӏкхетаре гуллургба СКФО кагирхой, театральни юкъарлон викалаш. Из царна дешара майда хинна ӏац, из я кхело мах оттабу моттиг, иштта балхацардар доаржадара йола таро.
