25 тонн гӀо дахьийтар вай мехкара Газе
19.06.2024 09:25
Газерча мискашта хьош йолча хӀамаех етта, ши машин наькъа араяьлар укх деношка вай мехкара. Из хоам «Сердалога» бир республикан парламентера.
«25 тонн йолча хӀамашта юкъе да барзкъаш, кисеш, кхача, иштта хӀара денна вахаре эшаш йола тайп-тайпара хӀамаш. Махачкалерча аэропортера Египте дӀакхоачаяь, цигара ЦӀеча Беттага дӀалургья уж, Дала аьннадале. ХӀамаш ийца Ӏоводар - Халкъа Гуллама депутат, «Тешам» яхача ганза хьалха латта Къоастой Ахьмад», - йоах хоамо.
Палестине из доккха туржаӀ эттача дийнахьа денз, цу мискача бусалба наха могаш дола новкъостал де гӀерташ хьабоагӀа вай мехкахой. Дуккха цигара беха нах паргӀатта баха, лела эшар Ӏалашдаь, тӀаийцаб вай республике безаш, лоархӀаш.
