Гӏалгӏай мехка тӏехкхоачашдергда 2026 шера фусамаш хьалъяра декхар
Гӏалгӏайчен министра гойт гӏишлон даькъ тӏара фусамаш хьалъяра хьал дика хилар;тешаш а ва федеральни оагӏорахьара хьалхашка оттадаь декхараш тӏехкхоачашдерга, аьнна. Из ховш хилар ерригроссийски селекторни кхетаче дӏахьош, цунна кулгал деш вар Россе ЖКХ, гӏишлон министра гӏонча Стасишин Никита.
Тов бетта 1-ча денга кхоачаш, республике дӏачуелар 124,116 эзар кв.м фусамаш, из Россе Министерство шера оттадеча декхарах 74,3% я. 2026 шера йистеяккха лерхӏаш я 167 эзар. кв. метр. Къаьстта дика дӏадодаш да вӏаштIардаь цӏенош хьалдеча даькъ тӏара балха хьал. Ер шу дӏадоладелча денз, Гӏалгӏайче хьалдаьд 6 вӏаштIардаь цӏа, цар юкъара моттиг дӏалаьрхӏача, из хул 49,003 эзар кв. метр. Дӏадахача шера укх хана хинначунца нийсдича, из 4,3-зза дукхагӏа я, е 330,25 я. Кхы а 75, 113 эзар кв. метр кхоач доалахьара гӏишлош хьалъяра даькъанна.
Республикан министерстве белгалду, шера доагӏа декхар кхоачашдарах шеко йолаш дац из хьал. 2026 шу чакхдалале, кхы а вӏаштIардаь кхо цӏа даь даргда. Таханарча хана уж 95% йистедаьннад.
«Лаьрхӏар кхоачаш цахилара кхерам болаш хӏама дац. Ер шу чакхдалале, оаха лерхӏ 3 МКД юкъедаккха, хӏанз уж 95% совгӏа кийча да. Деррига а дӏалаьрхӏача 2026 шера республике лерхӏ 185 эзар гаргга кв. метр фусамаш хьалъе, из федеральни планал совгӏа хул», - аьлар республикан гӏишлошъяра министра гӏончас Евкуранаькъан Мухьмада.
Цунца цхьана боахамо кӏийле еш латт гӏишлон хьал дӏахо а совдаккхара. 56,9 гектар лаьттан тӏа таро я 1 млн кв. метр фусамаш хьалъе.
Карарча хана республике 51 бокъо йолаш я вӏаштIардаь цӏенош хьалдара. Цул совгӏа, Гӏалгӏайчен гӏишлон Министерство юха дӏайолаеш я, хьалхагӏа соцаяь хинна МКД 13 проект.
Цу тайпара лакха гойтамаш, гӏишлош хьалъяра дика кӏийле хиларах; Гӏалгӏайчен таро я тӏехьа тӏадоагӏача шерашка а гӏишлон даькъ тӏа дика толамаш даха.
