Гӏалгӏайчено дӏагойтар, МӏТТ гойтам дӏахьош, туристически таронаш йоккхий йолга
11.03.2026 15:42
Гӏалгӏайчено халкъашта юкъера туризма, хьаьша тӏаэцара МӏТТ гойтам дӏахьош ший таронаш йовзийтар, яхаш, диийцар «Сердало» газетага ГӏР министрий Кабинета зарбан болх лелабераша.
«Республикан викалаша гойтар дукхагӏа наха хоржаш дола туризма наькъаш, наькъахошта лаьрхӏа дола керда лостамаш. Хьаьшашта хоза хет лоаман туризм. Эггара дукхагӏа хоржаш яр я «ӏарамхи», гӏалай комплексаш, иштта республикан лоаман хоза наькъаш», - аьлар хоамо.
Цу юкъе, мехка дика дегӏадоагӏаш да керда наькъаш хьаделлара хьал. Иштта туристий терко тӏаозаш ба Шолжа кхале гӏолла бода никъ; цига туристашта нийслу тайп-тайпара безаме нах; уж, цар ӏадаташ, кулгаговзал, республикан мах бола культура йовзар а хул цига.
