Гӏалгӏайчен миллиард гаргга ахча лургда ишколаш, берий бешамаш тоае
Гӏалгӏайчен ӏаьдала керттерча декхарех цаӏ да- укх заман берий бешамаш, керда ишколаш хьалъяр, къаьнаръяраш кердаяхар. Цох тийша да республикан къонача тӏехьен дика кхетам балар, уж дегӏаахар.
Къаьстта цудухьа даим из болх дӏахьош ба. Укх гаргарча кхаь шера уж хаттараш кхоачашде Гӏалгӏайчен лургда 1 миллиард гаргга ахча. Из вӏаштӏехьдоал республикан Паччахьалкхено, республикан дешара, ӏилман Министерствос айхха бувзам лелабарах; цул совгӏа, Россе дешара Министерствос новкъостал дарах.
Гӏалгӏайчен кулгалхочо Келаматанаькъан Махьмуд-ӏаьлас ма аллара, ерригроссийски хьажарах чакхъяларах республикан лургда 874 миллион сом, 2028-2029 шерашка ийс ишкол, йиъ берий беш цӏенхаштта тоаергья, кхы а 115,3 миллион сом хьалургда 2027 шера йиъ ишкол кердаяккха.
Иштта вай республикера дешара хьал хьаллацарах, къаьстта баркал аьлар Россе дешара министра Кравцов Сергейна. 2022 шера денз Гӏалгӏайче овлангара тоаяьй 44 ишкол, 6 берий беш, цхьа колледж, из бахьан долаш 2025 шера республика юкъейоагӏаш хилар дикагӏа йолча 14 моттига, уж белгалйир ишкола даькъ тӏа дика хьал хьакхолларах.
Карарча шера из болх дика дӏабахьа лаьрхӏад, керда президентски къаман проекташ хиларах. Цу тайпара, «Кагирхой, бераш» яхача къаман проекта чудоагӏаш, гӏишлонхоша Магӏалбика Чахкенаькъан Саӏида цӏерагӏча №1 йолча гимназе беррига болх кердабаьккхар, «Дикагӏдар берашта» яхача федеральни проекта чудоагӏаш. Иштта тоайир Гӏалгӏайчен, ӏарпенаькъан Ю.И. цӏерагӏа политехнически колледж «Профессионалитет» яхача программа чудоагӏаш. Цунца цхьана доккхий хувцамаш хилар деша даха ха йоацача берий урхалленашка «Дезал» яхача къаман проекта, иштта «Дезал хьаллацар» яхача федеральни проекта чудоагӏаш, цӏенхаштта тоайир деша даха ха йоацача берий урхалленаш: «Селаӏад» яха Гӏажарий-Юртара берий беш, Жӏайрахьара «Золушка”, Магасера Ӏарпенаькъан М.А. цӏерагӏа «Фаьлг», Магӏалбика шахьара «Бӏенилг» яха берий бешамаш.
