Ший культуран ганз гойтаргья вай мехко КИФ-2026 оалача кхетаче
Бекарга бетта 28-ча денгара 30-ча денга кхаччалца Минводерча МВЦ «МинводыЭКСПО» яхача доазон тӏа укх шерара эггара лоархӏамегӏа йола кхетаче - Кавказски инвестиционни кхетаче йоаржаеш хургба. «Аьттонца дувзаденнараш дикка дӏашердеш» яхача хьалхаленца дӏахьоргья кхетаче. Цига дакъа лаца кийчо еш ба мехкарча культурани туризмаи гӏулакхех йолча министерствон болхлой.
«Культурага гӏолла чӏоагӏлу наха юкъера бувзам, цунга гӏолла лораду къаман ӏадаташ, истори, лоархӏамедараш. Россе Президента кхайкадаьча цхьоагӏон Шерца лоархӏаме болх гойташ хургья из моттиг, дега тоам беш да, цу оагӏонга гӏолла Кавказерча къамай Фестиваль йоаржае лаьрхӏа хилар», - язду вай Мехкадас Келаматанаькъан Махьмуд-ӏаьлас ший Телеграм-канала тӏа.
Кавказски инвестиционни кхетаче дакъа лацар боккха пайда луш гӏулакх да. Вай мехкарча культураца, туризмаца дувзаденнараш, экономически оагӏонцара лоархӏамедараш санна, дӏадовзийта йиш я боккхача гулламе.
