Минводе кхетаче йолаш, ший проекташи лерхӏараши довзийтаргда вай мехко
Минводерча МВЦ «МинводыЭкспо» яхача моттиге маьтсела бетта 17-ча денгара 19-ча денга кхаччалца дӏаяхьа лерхӏача Кавказа инвестицей кхетаче дакъа лоацаш хургба вай мохк. Из хоам «Сердалога» бера Паччахьалкхен зарбан болх лелаберашкара.
«Къилбаседа Кавказа федеральни оагӏонцарча лоархӏамеча гӏулакхех йолча моттиге шоай проектех, лаьрхӏарех дувцаргда вай мехкарча викалаша», - йоах тхогарча хоамо. Йоккхача кхетаче гуллургба бизнесменаш, ӏаьдала болхлой, хӏама доаржадарах йола институташ.
Шоай регионашкарча экономиканна пайда бергбараш довза, иштта цхьацца лоархӏаме проекташ гойта, экономически оагӏонцара бувзам чӏоагӏбе аьттув хургба гулбеннарий. Белгалде деза, ишттача моттиге дакъа лацар вай мехкарча экономически хьала, иштта кхыдолча оагӏонашта диканна долга.
