Гӏалгӏайче дакъа лоацаш хургья, «Дошо гуйре» яхача юртбоахама гойтаме
Гӏалгӏайчен юртбоахама Министерствон викалаш дакъа лоацаш хургба, керттерча «Дошо гуйре» яхача 28-ча Российски гойтаме. Юртбоахама кхетаче дӏахьоргья Москве, ардара бетта 7-10-ча деношка. Карарча шера керттера гойтам хургба «Тимирязева Центр» яхача дешара-гойтама моттиге, цига Гӏалгӏайчен говзанчаша гойтаргья республикан таронаш, иштта дувцаргда АПК дегӏаахара лоархӏаме хаттараш.
«Гойтам балха юкъе дакъа лоацаш хургва Гӏалгӏайчен юртбоахама, кхачан министр Гаьгенаькъан Мухьмад. Цига довзаргда агропромышленни даькъ тӏа даьха керда толамаш, иштта дувцаргда лоархӏаме хаттараш, кхыча моттигашкара баьхкача викалашкара балха говзал эцаргья», - аьлар «Сердало» газетага республикан юртбоахама Министерстве.
«Дошо гуйре» яхача юртбоахама гойтаме довзийтаргда кердадараш, уж я минеральни удобренеш, юртбоахама керда техника. Къаьстта терко тӏайохийтаргья вай заман технологически гӏирсашта, таьрахьий хьалашта, цар хӏанззе а хийцад АПК хьал. Цул совгӏа, дика балха говзал, толамаш гойтаргда мехка хьалхале лелаеча заводаша, йоккхагӏа йолча агрохолдингаша.
