«ЖКХ ишкол» яхача проекта кхетаче дакъа лаьцар республико
«ЦаӀ йола Росси» яхача парте «ЖКХ ишкол» яхача Москве дӀайихьача федеральни проекта кхетаче дакъа лаьцар вай республико. РФ тайп-тайпарча моттигашкара проекта болх нийса дӀабахарга хьожараш гулбеннабар цхьан доазон тӀа. Вай мехкара цига ваха хилар проекта гӀонча ТӀумхой Хьамзат.
Из хоам «Сердалога» бир парте зарбан болх лелабераша. ЖКХ оагӀонца дувзаденна керттердараш доашхаш хилар гулбеннараш. Единороссаша белгалдир; наьха вахара хьал тоадара тӀехьа къахьегаргда, аьнна.
«Эггара хьалха ЖКХ оагӀонца дувзаденна дола наьха вахарера кхоачамбоацараш теркалде деза вай. Из болх боаггӀача боараме дӀагӀоргболаш, дикка тоабергболаш вӀашагӀъелла я из проект. Бахархошта, Ӏаьдала болхлошта, компане кулгалхошта юкъе массахана бувзам хургболаш, къахьегаш да тхо», - аьлар ТӀумхой Хьамзата.
