Цхьанкхийттача культурай Халкъашта юкъерча Xӏӏ кхетаче дакъа лоацаш ба вай мохк
Мехкарча кинематографистий Союза кулгалхо, театра, кинон, кердадарий оагӏон хьалха латта Дзортанаькъан Мадина культурах йолча Xӏӏ Халкъашта юкъерча кхетаче дакъа лоацаш я. Из йоккха кхетаче дӏайихьар Санкт-Петербурге.
«Иштта йола кхетаченаш лоархӏаме я, моллагӏа хӏама дашха йиш хиларах. Культуран тайп-тайпарча оагӏонашка къахьегаш бола нах ба цига гуллураш, пайданедараш дӏа-хьа эц, лаьрхӏарех, проекташ цхьана йоаржаярах дувц цига. Республике доаржадича дика хургдараш хьаэца аьттув ба вай цигара. Тахан дӏахьоча балха тӏа накъадаргда аьнна хет сона цига дувцаргдараш», - аьлар Дзортанаькъан Мадинас «Сердало» газета интервью луш.
«Цхьанкхийтта культураш - юкъара лоархӏамедараш» яхача хьалхаленца дӏахьош яр из кхетаче. 70 совгӏа йолча паччахьалкхенгара викалаш вӏашагӏтохаш болх хилар цох, цу юкъера 44 викал доазол арахьарча мехкашкара кхаьчавар. Мариински театра Кердача сцена тӏа йоккха кхетаче дӏаяхьар хилар эггара лоархӏаме. Россе Президента Путин Владимира къамаьл дир цига.
Истореца двзаденнараш, къамий метташ, ӏадаташ лорадарах, 10 оагӏонашца тайп-тайпара йола проекташ цхьана йоаржаярах дийцар. Цу юкъе дар театра, кинон, музейни, ИТ-технологе гӏулакхашца дувзаденнараш. Кхоллама болх таьрахьашца дувзаденнарашка гӏолла боаржабар, кинематографа хӏама хьаллацар, культураца дувзаденнараш лорадар да тахан вай мехка лоархӏаме.
«Петербурга шера ханаш» яхача фестивала программ йоаржаеш, дӏахойихьар кхетаче. Царское Село оалача моттиге экскурски е, «Чайка» балетага хьажа, «Вежарий Карамазовш» яха спектакль йовза кхийра Дзортанаькъан Мадинай, цига йоаккхача хана.
